Blaut tuska frá Björgólfsfeðgum

Þetta svokallaða "tilboð" Björgólfsfeðga hlýtur að vera mesta ósvífni Íslandssögunnar.

Að skvetta þessu framan í þjóðina um leið og verið er að neyða okkur til að borga Icesave-skuldir þessara sömu manna upp á fleiri hundruð milljarða er þvílík óhæfa að annað eins hefur ekki heyrst í manna minnum.

Að málið skuli vera til umræðu, eins og haft er eftir forstöðumönnum Kaupþings, er svo eitt hneykslið í viðbót.

Að sjálfsögðu á ekki að ræða þetta mál, það á að senda þessa menn heim til sín að sækja peninga til að borga skuldir sínar.

Sá yngri er enn á lista yfir ríkustu menn heims og ætti að skammast sín!!!

Ætli málið yrði haft "til umræðu" ef við, almennir borgarar, gerðum bönkunum svona "tilboð" um að borga tæpan helming af skuldum okkar?

Ó, nei, það er ekki reynsla þeirra sem nú eru að missa heimili sín vegna gjörða þessara manna og kollega þeirra.

Ég er hrædd um að Vilhjálmur hafi á réttu að standa, hér muni brjótast út borgarastyrjöld ef Kaupþing verður við þessum ósvífnu óskum feðganna.

Varar við borgarastyrjöld

Hvar liggur snobbið og hrokinn?

Mér finnst umræðan um þessa frétt afar neikvæð. Liggur umrætt snobb og hroki kannski frekar í kerfinu sjálfu heldur en í foreldrum sem eru að reyna að styðja börnin sín í mótlætinu og hjálpa þeim að takast á við höfnunartilfinninguna?

Að sjálfsögðu þurfa allir að læra að takast á við mótlæti en það er samt sem áður erfitt fyrir 15-16 ára unglinga að taka endurtekinni höfnun.

Ég vil ítreka það að ég tel þetta "elítu"- fyrirkomulag slæmt, skólasamfélagið verður einsleitara þar sem valið er inn eftir einsleitum hæfileikum. Fólk þarf ekki bara að læra að taka höfnun - það þarf líka að læra að lifa og starfa í fjölbreytilegu samfélagi með einstaklingum sem búa  yfir fjölbreytilegum hæfileikum - ekki bara hæfileikanum til að fá háar einkunnir í skólanum.

Það er margt annað mikilvægara í lífinu en háar einkunnir og skólarnir eiga að endurspegla það.

Mér finnst þessi umræða endurspegla ástandið í samfélaginu - við erum reið og hötum snobb og hroka sem er birtingarmynd þess sem hefur komið okkur sem þjóð á kaldan klaka - en það er ekki venjulegum foreldrum, sem eru að reyna að plástra sár barna sinna, að kenna.

Þessi umræða er orðin ansi persónuleg finnst mér og mig langar til að minna á þau fleygu orð að aðgát skal höfð í nærveru sálar.

Aftur til hverfaskólanna

Er ekki kominn tími til að hverfa aftur til gamla kerfisins þar sem krakkarnir fóru bara ósköp einfaldlega í þann skóla sem var næstur heimilum þeirra?

Mér hugnast ekki þessi elítu-hugsun og held að það sé betra að skólarnir séu bara þversnið af samfélaginu - endurspegli þann veruleika sem við búum öll í og unglingarnir eiga eftir að lifa og starfa í.

Fyrir nú utan mengunina sem hlýst af öllum akstrinum langar leiðir í skóla og meðfylgjandi kostnað. 

Samræmdu prófin voru slæm en þetta virðist enn verra.

Ég skil vel áhyggjur móðurinnar af tilfinningum dóttur sinnar, svona síendurtekin höfnun tekur á sálartetrið og við erum hér að tala um óharðnaða unglinga.

 

 

 

Foreldrar bálreiðir

Hærri skatta frekar en niðurskurð

Ef Tryggva finnst of skammt gengið hefði hann getað stungið upp á hærri hátekjuskatti og einnig hefði mátt hafa mörkin lægri - byrja t.d. hátekjuskattinn við fimmhundruð þúsundin. Það hefði ekki verið óeðlilegt, hvorki í ljósi aðstæðna né miðað við önnur lönd.

Það er hins vegar lausn sem sjálfstæðismenn sjá ekki - þeir vilja frekar skera niður heilbrigðiskerfið og skólana.

Vildu meiri niðurskurð

Loksins eitthvað jákvætt í fréttum

Markmiðin með þessum nýju verðlaunum eru mikilvæg. Það er mikilvægt að ýta undir skapandi hugsun og samþætta listgreinar og aðrar námsgreinar. Hefði líka mátt taka fram að efla ætti gagnrýna hugsun en hún fylgir vonandi í kjölfarið.

Ný verðlaun kennd við Erró

Hvað varð um gagnsæið???

Var ekki talað um það fyrir kosningar að mikilvægt væri að auka gagnsæi og að allt ætti að vera uppi á borðum þannig að allir gætu kynnt sér málin og tekið afstöðu til þeirra?

Ég man ekki betur þó að einhverjir stjórnmálamenn virðist vera búnir að gleyma því.

Hvað eru ráðherrar og samninganefndin eiginlega að hugsa?

Hvers konar bull er þetta?

Þingmenn hljóta að hafna því sem þeir fá ekki að kynna sér, ég trúi ekki öðru.

Ekki ríkisábyrgð á leynisamning

Kjörgripurinn er á netinu

Ég vil benda áhugasömum á vefinn þar sem kjörgripurinn er www.landsbokasafn.is

Slóðin beint á bókina er:

http://landsbokasafn.is/uploads/kjorgripur/altaeka.pdf

73 ára gömul hagfræðibók kjörgripur mánaðarins

Er atvinnulausu fólki hættara við slysum?

Undarlegt finnst mér að álykta strax sem svo að fólk sé að svindla og jafnvel að skaða sjálft sig og það að algjörlega óathuguðu máli.

Er ekki frekar líklegt að fólk sé veikara fyrir á þessum erfiðu tímum, ónæmiskerfið veikist hreinlega?

Hvað slysin varðar er ekki ólíklegt að stress og kvíði þeirra sem horfa fram á atvinnuleysi valdi því að þeim sé hættara við slysum.

 

Tíðari veikindi - Fleiri slys

Eignafrysting of seint á ferðinni?

Hefði viljað sjá eignafrystinguna ná fram að ganga meðan mál eru rannsökuð til botns. En það er spurning hvort það sé ekki of seint í rassinn gripið - menn hafa haft hátt á fjórða mánuð til koma auðæfunum undan. Og hafa líkast til ekki skirrst við það ef marka má frásögn Ara Matthíassonar í Silfri Egils síðasta sunnudag. Svo á almenningur að borga brúsann! Svei!

Fundað um stjórnarmyndun

Jóhanna besti kosturinn

Þetta er frábær lausn, enginn efast um heilindi Jóhönnu og kjark hennar til að takast á við erfið verkefni. Hún mun hreinsa til í spilltu kerfi. Ég vona svo sannarlega að stjórnmálamennirnir beri gæfu til að fallast á hennar verkstjórn.

Jóhanna næsti forsætisráðherra?